ພະຈິກ 25, 2017, 01:41:16 AMສະມາຊິກຄົນຫຼ້າສຸດ: Blaclegs Angel
ແຕ້ມແສງ.ຄອມ » dSLR » Learning board » ຫຼັກການພື້ນຖານໃນການຖ່າຍພາບ ຕອນທີ ໒: ປະເພດຂອງເລນ (Lens)
ຈຂກທ. ກະທູ້: ຫຼັກການພື້ນຖານໃນການຖ່າຍພາບ ຕອນທີ ໒: ປະເພດຂອງເລນ (Lens)  (ອ່ານ 3271 ເທື່ອ)
0 ຄົນ ແລະ 1 ຂາສັນຈອນ ກຳລັງເບິ່ງກະທູ້ນີ້.
au8ust
Administrator
Sr. Member
*****
ໂພສ: 456

ເບິ່ງຂໍ້ມູນສະມາຊິກ ເວັບໄຊ ອີເມລ
« ເມື່ອ: ທັນວາ 12, 2009, 01:36:53 PM »

ຫຼັງຈາກທີ່ຂຽນຕອນກ່ອນໜ້ານີ້ໄປດົນນນນນນ ໃນ http://tamsang.com/index.php?topic=6.0 ມື້ນີ້ກໍກັບມາຂຽນຕອນຕໍ່ໄປ (ແຕ່ອາດຈະບໍ່ຕໍ່ເນື່ອງປານໃດ) ..

ຫົວຂໍ້ທີ່ຈະນຳສະເໜີໃນມື້ນີ້ແມ່ນເລື່ອງປະເພດຂອງເລນ (Lens) ໂດຍຈະເນັ້ນໄປທີ່ເລນທີ່ອອກແບບມາສຳລັບກ້ອງ dSLR ແລະ SLR ກັນ.



ຈຸດເດັ່ນຢ່າງນຶ່ງຂອງກ້ອງ dSLR ເມື່ອປຽບກັບກ້ອງ Compact ທົ່ວໄປກໍຄື ການທີ່ສາມາດປ່ຽນເລນທີ່ໃຊ້ກັບກ້ອງໄດ້ ຜູ່ໃຊ້ສາມາດເລືອກໃຊ້ເລນຕາມຄວາມເໝາະສົມຂອງຕົວແບບທີ່ຈະຖ່າຍ ເຊັ່ນ ຫາກເປັນງານປະເພດຖ່າຍບຸກຄົນ ກໍອາດເລືອກເລນໄລຍະ prime (ຫຼືເລນ fixed ເຊິ່ງເປັນເລນທີ່ບໍ່ສາມາດປັບປ່ຽນໄລຍະຂອງເລນໄດ້) 50mm ຫຼື 85mm ຫຼື 135mm ເພື່ອໃຫ້ແຍກພື້ນຫຼັງອອກຈາກຕົວແບບໄດ້ດີຂຶ້ນ ໃນຂະນະທີ່ການຖ່າຍພາບຝູງຊົນຈຳນວນຫຼາຍນັ້ນ ອາດເລືອກໃຊ້ເລນທີ່ມີຄວາມກວ້າງຫຼາຍໆ ເຊັ່ນເລນ 28mm ເປັນຕົ້ນ.


ປະເພດຂອງເລນ
ໂດຍທົ່ວໄປແລ້ວ ເລນທີ່ໃຊ້ກັບກ້ອງ dSLR ຈະມີຢູ່ 2 ປະເພດຄື Prime lens ແລະ Zoom lens:

Prime lens
Prime lens ຫຼືເອີ້ນອີກຢ່າງນຶ່ງວ່າ Fixed lens ເປັນເລນດັ້ງເດີມທີ່ມີມາກ່ອນ ເລນປະເພດນີ້ຈະບໍ່ສາມາດປັບປ່ຽນທາງຍາວໂຟກັສ (focal length) ໄດ້ ມັນຈະມີໄລຍະຢູ່ຕາຍໂຕ (ເປັນເຫດໃຫ້ບາງຄັ້ງຈຶ່ງເອີ້ນວ່າ Fixed lens) ເຊັ່ນເລນ 50mm ກໍຈະຖ່າຍໄດ້ແຕ່ໄລຍະ 50mm ບໍ່ສາມາດປັບປ່ຽນເປັນໄລຍະອື່ນໄດ້. ຂໍ້ດີຂອງເລນປະເພດນີ້ຄື ມີຮູຮັບແສງທີ່ກວ້າງຫຼາຍ ເລນບາງເລນອາດຈະມີຮູຮັບແສງກວ້າງລະດັບ f/0.95 ເລີຍກໍເປັນໄດ້ ແຕ່ຢ່າງໃດກໍຕາມ ເລນທີ່ມີຮູຮັບແສງກວ້າງຫຼາຍໆ ນັ້ນ ຈະມີລາຄາແພງຂຶ້ນຫຼາຍເທົ່າ.

Prime lens ປົກກະຕິຈະມີຄວາມຄົມຊັດ ແລະມີຄຸນນະພາບຂອງແກ້ວທີ່ດີກວ່າ Zoom lens ເພາະມັນຖືກອອກແບບມາໃຫ້ເຮັດວຽກໄດ້ດີທີ່ສຸດ ແສງຜ່ານເຂົ້າໄປໃນຊັ້ນແກ້ວໄດ້ດີທີ່ສຸດໃນໄລຍະໃດນຶ່ງທີ່ຖືກອອກແບບມາ. ນອກຈາກນັ້ນ Prime lens ຍັງມີຂະໜາດທີ່ເບົາກວ່າ ແລະນ້ອຍກວ່າ zoom lens ອີກນຳ.


ທາງຊ້າຍ ເລນ Nikon AI 28mm f/2.8, ທາງຂວາ Nikon AF 35-135mm f/3.5 - 4.5

ຂໍ້ດີຂອງ Prime lens ກໍຄື ມີຂະໜາດເບົາ, ລາຄາຖືກ ແລະມີຮູຮັບແສງທີ່ກວ້າງຫຼາຍ ຊ່ວຍໃຫ້ສາມາດຖ່າຍພາບໃນສະຖານທີ່ແສງໜ້ອຍໄດ້ດີ ແຕ່ກໍມີຂໍ້ເສຍບ່ອນວ່າ ບໍ່ສາມາດປັບປ່ຽນທາງຍາງໂຟກັສໄດ້, ພາສາຊາວບ້ານເພິ່ນວ່າ “ຊູມບໍ່ໄດ້” ແຕ່ຜູ່ຂຽນຄຶດວ່າຊູມໄດ້ ໂດຍໃຊ້ຂາຊູມເອົານັ້ນເອງ.

Zoom lens

ເລນປະເພດຊູມນີ້ ເປັນເລນທີ່ສາມາດປັບປ່ຽນທາງຍາວໂຟກັສໄດ້ ເຊັ່ນເລນ Nikon AF 35-135mm f/3.5 - 4.5 ນັ້ນ ກໍໝາຍຄວາມວ່າ ເລນໂຕນີ້ສາມາດປັບທາງໂຟກັສໄດ້ຕັ້ງແຕ່ 35mm ໄປຈົນເຖິງ 135mm ແລະມີຮູຮັບແສງກວ້າງສຸດເຖິງ f/3.5 ແລະແຄບສຸດ (ເມື່ອເວລາໃຊ້ທາງຍາວສູງສຸດທີ່ 135mm) ທີ່ f/4.5.


ດ້ານຊ້າຍມືແມ່ນເລນ Nikon AF 35-135mm f/3.5 - 4.5 ແລະຂວາມືແມ່ນເລນດຽວກັນເມື່ອປັບທາງຍາວໂຟກັສໄປທີ່ 135mm

ເລນຊູມທີ່ມີລາຄາແພງໆ ຈະມີຮູຮັບແສງທີ່ຕາຍໂຕ ບໍ່ປ່ຽນແປງ ເຊັ່ນ Nikon AF-S 70-200mm f/2.8G ສາມາດປັບທາງຍາວໂຟກັສໄດ້ຕັ້ງແຕ່ 70mm ແລະສູງສຸດທີ່ 200mm ໂດຍທີ່ຄ່າ aperture ຫຼືຮູຮັບແສງນັ້ນ ຄົງທີ່ຢູ່ f/2.8 ບໍ່ປ່ຽນແປງ (ແຕ່ປ່ຽນໄດ້ ຫາກຕ້ອງການ). ເລນທີ່ມີຮູຮັບແສງຄົງທີ່ນີ້ ຈະມີລາຄາແພງກວ່າເລນທີ່ມີຮູຮັບແສງບໍ່ຄົງທີ່ ແລະມີຂະໜາດທີ່ໃຫຍ່ກວ່າ ພ້ອມທັງໜັກກວ່າຫຼາຍ.

ຜູ່ໃຊ້ທົ່ວໄປມັກຈະຄຸ້ນເຄີຍກັບເລນປະເພດນີ້ຫຼາຍທີ່ສຸດ ເພາະມັນມີຄວາມສະດວກວ່ອງໄວໃນການປັບປ່ຽນທາງຍາວໂຟກັສ ໂດຍທີ່ບໍ່ຕ້ອງປ່ຽນເລນ ຊ່ວຍໃຫ້ໄດ້ພາບງ່າຍຂຶ້ນ ແລະໄວຂຶ້ນ. ອີກທັງເລນປະເພດນີ້ມັກຈະຖືກຂາຍໄປນຳ Kit ຂອງກ້ອງລຸ້ນຕ່າງໆ ເຊັ່ນ Nikon D90 Kit ກໍຈະມີໂຕກ້ອງ D90 ເອງແລະມີເລນ Nikon AF-S DX 18-105mm f/3.5-5.6 ມານຳ (ໃນລາຄາທີ່ຖືກກວ່າຊື້ແຍກກັນເລັກນ້ອຍ).

ຂໍ້ເສຍຂອງ Zoom lens ກໍຄື ມີຂະໜາດໃຫຍ່, ນ້ຳໜັກຫຼາຍ ແລະມີຮູຮັບແສງທີ່ແຄບ ແຕ່ກໍແລະມາກັບຄວາມສະດວກດັ່ງທີ່ກ່າວໄປແລ້ວຂ້າງເທິງ.

ທາງຍາວໂຟກັສ ແລະມຸມມອງຂອງພາບ
Focal length ຫຼືທາງຍາງໂຟກັສນັ້ນ ໃນກະທູ້ນີ້ຈະບໍ່ຂຽນດ້ານເທັກນິກ ຖ້າຢາກອ່ານແບບວິຊາການ ກະລຸນາອ່ານໃນ http://en.wikipedia.org/wiki/Focal_length ແລະ http://en.wikipedia.org/wiki/Angle_of_view ເພາະຄົນຂຽນ ອ່ອນວິຊາການ  ::)

ທາງຍາວໂຟກັສ ແລະມຸມມອງຂອງພາບ (Angle of view) ມີຜົນເຊື່ອມໂຍງກັນ ໃນເບື້ອງຕົ້ນ ເຮົາຈະມີເວົ້າກັນເລື່ອງຂອງທາງຍາວໂຟກັສກັນກ່ອນ ໃນການຖ່າຍພາບນັ້ນ ເພິ່ນແບ່ງໄລຍະຂອງທາງຍາວໂຟກັສອອກເປັນ 3 ປະເພດໃຫຍ່ໆ ກໍມີ:

  • Wide angle
  • Normal
  • Telephoto


Wide Angle
ເລນ Wide angle ນັ້ນ ເປັນໄລນທີ່ມີທາງຍາວໂຟກັສຕ່ຳໆ ເຊັ່ນ 24mm ໄປຈົນ 35mm ແຕ່ກໍມີເລນທີ່ມີທາງຍາວໂຟກັສຕ່ຳກວ່ານັ້ນອີກ ເຊັ່ນ 14mm ເປັນຕົ້ນ. ທາງຍາວໂຟກັສທີ່ຕ່ຳແບບນີ້ ມີຜົນໃຫ້ມຸມມອງຂອງພາບ ຫຼື Angle of view ນັ້ນປ່ຽນໄປ ກ່າວຄື ມັນຈະໃຫ້ມຸມມອງພາບທີ່ກວ້າງຫຼາຍ ນັບເປັນອົງສາແມ່ນ 60 ຫາ 180 ອົງສາ ຫຼືຫຼາຍກວ່ານັ້ນເລັກນ້ອຍ.


ຮູບນີ້ຖ່າຍດ້ວຍເລນ Tamron 10-24mm ໂດຍໃຊ້ທາງຍາວໂຟກັສທີ່ 10mm (ທຽບເທົ່າ 15mm ໃນກ້ອງ DX-format) ຈະເຫັນວ່າໄດ້ມຸມມອງຂອງພາບທີ່ກວ້າງຫຼາຍ ໂດຍທີ່ບ່ອນວາງປື້ມນັ້ນ ຫ່າງອອກໄປພຽງ 1.5 ແມັດ.

ເລນ Wide angle ມັກຈະນິຍົມໃຊ້ຖ່າຍພາບສະຖາປັດຕະຍະກຳ, ບ້ານເຮືອນ, ຜູ່ຄົນຈຳນວນຫຼາຍ, ແລະພາບວິວຕ່າງໆ ເພາະໃຫ້ຄວາມກວ້າງຂອງພາບຫລາຍເປັນພິເສດ.


Normal
ເລນ Normal ເປັນເລນໄລຍະປົກກະຕິທີ່ຕາຄົນເຮົາເບິ່ງເຫັນໄດ້ ໂດຍທົ່ວໄປໝາຍເຖິງເລນທີ່ມີທາງຍາວໂຟກັສໃນຊ່ວງ 50mm ມີອົງສາການຮັບພາບຊ່ວງ 53 ອົງສາ.


ໃນຈຸດດຽວກັບຮູບດ້ານເທິງ ແຕ່ຖ່າຍໂດຍໃຊ້ເລນ Nikon AF 50mm (ທຽບເທົ່າ 75mm ໃນກ້ອງ DX-format) ຈະເຫັນວ່າ ມຸມມອງຂອງພາບນັ້ນ ແຄບລົງຫຼາຍເມື່ອທຽບກັບເລນ Wide angle.

Telephoto
ມາຮອດເລນ Telephoto ເລນປະເພດນີ້ຈະມີອົງສາການຮັບແພງທີ່ແຄບຫຼາຍ ໃນໄລຍະທາງຍາວໂຟກັສ 135mm ນັ້ນ ຈະອົງສາການຮັບພາບພຽງ 18.2 ອົງສາເທົ່ານັ້ນ.


ຈຸດດຽວກັບທີ່ຖ່າຍສອງຮູບເທິງ ແຕ່ປ່ຽນໄປໃຊ້ເລນ Nikon AI 135mm (ທຽບເທົ່າ 202.5mm ໃນກ້ອງ DX-format) ຈະເຫັນວ່າ ພາບໄດ້ນັ້ນເຫຼືອພຽງສ່ວນນ້ອຍໆ ຂອງປື້ມເທົ່ານັ້ນ (ແຕ່ມີຂະໜາດໃຫຍ່).

ເລນ Telephoto ມັກນິຍົມໃຊ້ຖ່າຍຮູບບຸກຄົນ ໂດຍສະເພາະໃນໄລຍະ 85mm ຫຼື 135mm. ການໃຊ້ເລນທີ່ມີທາງຍາວໂຟກັສສູງໆ ເຊັ່ນ 600mm ກໍຈະມີໃນກຸ່ມນັກຖ່າຍຮູບນົກເປັນຕົ້ນ ເພາະໄລຍະຫ່າງລະຫວ່າງກ້ອງແລະຕົວແບບຢູ່ໄກກັນຫຼາຍ.



ຄວາມແຕກຕ່າງລະຫວ່າງເລນໄລຍະຕ່າງໆ ຕັ້ງແຕ່ 10mm, 50mm ແລະ 135mm (ທຽບເທົ່າ 15mm, 75mm ແລະ 202.5mm ໃນກ້ອງ DX-format) ຕາມລຳດັບຊ້າຍຫາຂວາ.


Lens mount
ຕອນຕົ້ນຂອງກະທູ້ນີ້ໄດ້ກ່າວໄປແລ້ວວ່າ ກ້ອງ dSLR ສາມາດປ່ຽນເລນໄດ້ ເຊິ່ງໃນຫົວຂໍ້ນີ້ຈະມາລົງລາຍລະອຽດໃນຈຸດນີ້ກັນ. ເລນທີ່ສາມາດໃຊ້ໄດ້ກັບກ້ອງແຕ່ລະຍີ່ຫໍ້ນັ້ນ ຈະຕ້ອງຂຶ້ນກັບ mount ຂອງມັນ.


ເລນທາງເທິງແມ່ນ Canon EF-S mount ສ່ວນທາງລຸ່ມແມ່ນ Nikon F-Mount.


ຜູ່ຜະລິດກ້ອງແຕ່ລະບໍລິສັດຈະມີ Mount ຂອງເລນເປັນຂອງຕົນເອງ ແຕກຕ່າງກັນໄປໃນແຕ່ລະຍີ່ຫໍ້.
  • Nikon ໃຊ້ lens mount ແບບດຽວຄື F-Mount.
  • Canon ໃຊ້ FD, EF ແລະ EF-S ຮຽງຕາມລຳດັບ.
  • Olympus ແລະ Kodak ພັດທະນາລະບົບ Four Thirds System.
  • Pentax ໃຊ້ K-Mount
ນອກຈາກລາຍຊື່ດ້ານເທິງແລ້ວກໍຍັງມີລະບົບ lens mount ອີກຫຼາຍໆ ແບບທີ່ບໍ່ໄດ້ກ່າວເຖິງເຊັ່ນ M42 ເປັນຕົ້ນ.

ເຈົ້າຂອງບໍລິສັດກ້ອງຕ່າງໆ ຈະຜະລິດເລນມາຮອງຮັບກ້ອງຂອງຕົນເປັນຫຼັກ ຍົກເວັ້ນບໍລິສັດຜູ່ຜະລິດເລນໂດຍສະເພາະເຊັ່ນ Tamron, Sigma, Zeiss, Tokina, ແລະອື່ນໆ ທີ່ຜະລິດເລນຮອງຮັບກ້ອງຫຼາຍໆ ຍີ່ຫໍ້ ເລນພວກນີ້ນິຍົມເອີ້ນກັນວ່າ “ເລນນອກຄ້າຍ” ສ່ວນເລນຂອງເຈົ້າຂອງບໍລິສັດກ້ອງຜະລິດເອງນັ້ນ ເອີ້ນວ່າ “ເລນຄ້າຍ”. ດ້ານລາຄານັ້ນ ເລນນອກຄ້າຍຈະມີລາຄາທີ່ຖືກກວ່າໂດຍສ່ວນຫຼາຍ ແຕ່ມີຄຸນນະພາບໃກ້ຄຽງກັບເລນຄ້າຍ ແລະ/ຫຼື ອາດຈະເໜືອກວ່າໃນບາງເລນ.

ການໃຊ້ເລນຂ້າມຄ້າຍນັ້ນ ເປັນເລື່ອງທີ່ສາມາດເຮັດໄດ້ໂດຍໃຊ້ອຸປະກອນຊ່ວຍ ເຊັ່ນທ່ານອາດຈະໃຊ້ເລນ EF ຂອງ Canon ໃນກ້ອງ Nikon ໂດຍການໃຊ້ adapter ແປງ mount ສຳລັບໃສ່ເລນໄດ້ ແຕ່ຄວາມສາມາດບາງຢ່າງຈະຫາຍໄປ ເປັນຕົ້ນວ່າ ລະບົບ Auto-focus ຫຼືລະບົບວັດແສງ.


ສຳລັບຕອນນີ້ກໍຈົບເທົ່ານີ້ດີກວ່າ ແຮງຂຽນແຮງສັບສົນ  ??? ຮະຮາ.. ກະທູ້ໜ້າຈະເວົ້າກ່ຽວກັບເລື່ອງ crop-factor ເຊິ່ງຈະເປັນແນວໃດກໍຖ້າອ່ານກັນຕໍ່ໄປ - -'
« ແກ້ໄຂຫຼ້າສຸດ: ມັງກອນ 06, 2012, 01:45:55 PM ໂດຍ au8ust » ເຂົ້າໃຊ້ລະບົບແລ້ວ

“If you don't build your dream someone will hire you to help build theirs.” - Tony A. Gaskins Jr.
nixsona
Newbie
*
ໂພສ: 29

ມັນຄືນົກສິບ
ເບິ່ງຂໍ້ມູນສະມາຊິກ ເວັບໄຊ ອີເມລ
« ຕອບກັບ #1 ເມື່ອ: ທັນວາ 23, 2009, 11:19:48 PM »

ຕາມສູດຂອງຟີຊິກແສງ

ເມື່ອ S1 ແມ່ນໄລຍະຫ່າງຂອງວັດຖຸຫາໃຈກາງເລນ
S2 ແມ່ນໄລຍະຫ່າງຂອງຮູບວັດຖຸຫາໃຈກາງເລນ
f ແມ່ນໄລຍະສຸມຂອງເລນ
ຈະເຫັນໄດ້ວ່າ ໃນສູດນີ້ມີດ້ວຍກັນ 3 ຕົວແປ ແລະ ຫລັກການທີ່ໃຊ້ສຳຫລັບເລນ(ຂໍເດົາວ່າ ;D)ມຸມມອງຂອງພາບຈະແຕກຕ່າງກັນຍ້ອນຕົວ S2 ກໍຄືໄລຍະຫ່າງຂອງຮູບວັດຖຸທີ່ຕົກກະທົບໃສ່ເຊັນເຊີຮັບພາບ
ສະແດງວ່າຖ້າຕ້ອງການ S2 ຈະເຮັດໃຫ້ຕົວແປເຫລືອພຽງແຕ່ S1 ຄືໄລຍະຫ່າງຈາກວັດຖຸ ຫາເລນ ເຂົ້າໃຈງ່າຍໆກໍຄືຈາກ ວັດຖຸຫາຄົນຖ່າຍ ແລະ f ກໍຄືໄລຍະສຸມຂອງເລນໃນກ້ອງ (ເຂົ້າໃຈວ່າໃນເລນຫນຶ່ງຕົວຄົງຈະມີເລນຫລາຍໆຕົວຊ້ອນກັນຢູ່) ນັ້ນຫມາຍຄວາມວ່າມີສອງທາງເລືອກ ຖ້າບໍ່ປ່ຽນ S1 (ໂດຍການໃຊ້ຂາຊູມ :D)
ກໍຄືຕ້ອງຢືນຢູ່ບ່ອນເກົ່າແລ້ວປ່ຽນ f ແທນ(ປ່ຽນເລນ) ຫລື ເຮັດທັງສອງຢ່າງ (ເພື່ອ ?? ??? )
ເຂົ້າໃຊ້ລະບົບແລ້ວ

www.graphicme.com | space for fresh creatives
I like graphic. Graphic's like me. That's GraphicME !........Ads by Google
Add
Newbie
*
ໂພສ: 4

ເບິ່ງຂໍ້ມູນສະມາຊິກ ອີເມລ
« ຕອບກັບ #2 ເມື່ອ: ມັງກອນ 27, 2012, 08:10:12 PM »

ເປັນບົດຮຽນທີ່ດີຫຼາຍ ຂ້າພະເຈົ້າອ່ານໝົດທັງສອງຕອນ ແລະ ຍັງລໍຖ້າຕອນທີ 3 ທີ 4 ຢູ່ເດີ້!!

ພິເສດ ແມ່ນຢາກໃຫ້ຊອກບົດຮຽນກ່ຽວກັບການວັດແສງ ແລະ ການຊົດເຊີຍແສງມານຳສະເໜີ
ເອົາແບບງ່າຍໆເຂົ້າໃຈໄວຄືທີ່ທ່ານຂຽນມາທັງສອງຕອນນີ້ເລີຍ ເພາະເຄີຍອ່ານຢູ່ປຶ້ມພາສາໄທເຫຼົ້ມໜຶ່ງ
ເຝິກຖ່າຍໄປມາກະຍັງງົງເລື່ອງວັດແສງ ແລະ ຊົດເຊີຍແສງຄືເກົ່າ..

ຂອບໃຈລ່ວງໜ້າທ່ານປະທານແຕັ້ມແສງ  :D
ຈາກນັກຮຽນໃໝ່
ເຂົ້າໃຊ້ລະບົບແລ້ວ